بخصوص مباراة مساعد معالج و مباراة تقني فالإسعاف 2023-2024 .
غناخد من وقتي و نكتب ليكم مقال مفصل لي مهتم بيهم يكمل البوسط كامل.
أولا مساعد معالج : المستوى المطلوب باش تقراها هو الكاطريام تكون قاريه كامل أو ديبلوم ديال أبغونتيساج لي كيدار بالسابعة يعني سوا كاطريام أو هاد الديبلوم فحالة مكانش عندك الكاطريام و بزاااف ديال الناس غافلين على هاد القضية ديال ديبلوم، المهم فشهر 10 غالبا كيتحل السيت لي كيتسجلو فيه كتسجل بالمعلومات الشخصية ديالك و كتأبلودي لكارط ناسيونال و شهادة مدرسية و بيان النقط من بعد مدة كيديرو فيها الإنتقاء و كتنشر اللائحة ديال المقبولين إيلا لقيتي راسك من بين هاد المقبولين كتكون بمثابة كونفوكاسيون باش تدوز امتحان كتابي لي كيكون غالبا عبارة عن أسئلة عامة و أسئلة عندها علاقة بالقطاع الصحي من بعد كيخرجو النتائج إيلا لقيتي راسك من بين الناجحين كتكون بمثابة كونفوكاسيون باش دوز الشفوي لي كيكون عبارة عن أسئلة كتخصك نتا و علاش بغيتي دير هاد الضومين و شي أسئلة نفسية و شي أسئلة مستفزة أحيانا هههه و من بعد هاد الشفوي كينشرو اللائحة النهائية للناجحين إيلا لقيتي راسك معاهم مبروك عليك غتدخل تبدا القراية لي هي عام داخل فيها قراية و سطاج و كتتوج فلخر بديبلوم مساعد معالج لي كيخوليك تخدم فسبيطارات ديال الدولة و كيكون الدور ديالو هو يسهر على راحة المريض بصفة عامة و كيعاون الطبيب فتوجاد الماطريال و ما إلى ذلك.
ثانيا تقني في الإسعاف و النقل الصحي : خاص ضروري يكون عندك نيفو باك يعني كملتي الباك كامل أو ديبلوم التأهيل لي كيدار بالكاطريام زائد خاصك تكون حاصل على رخصة السياقة سطر عليها مزيان نيفو باك أو ديبلوم التأهيل فحالة مكانش عندك نيفو باك زائد رخصة السياقة و بالنسبة للتسجيل هو نفسو فحال مساعد معالج فنفس السيت و نفس المراحل فقط كيتزاد البيرمي مع الوثائق و حتى هو كيدوز من جميع المراحل ديال الإنتقاء و الإمتحان الكتابي و الشفوي و لكن الإمتحان الكتابي كيكون مختالف و كيتزادو شي أسئلة ديال البيرمي و ملي كتنجح فجميع المراحل كتبدا القراية فيه عماين داخلة فيها قراية و سطاج و من بعد كتاخد ديبلوم تقني لي كيخولك تخدم فالسبيطارات الإقليمية و الجهوي و الجامعية CHU, كتسوق سيارة الإسعاف و كدير الإسعافات اللازمة للمصاب أو المريض،.
معلومات إضافية:
- الصالير ديال مساعد معالج كان 4200 ودبا سمعت بلي رجع 4600
و تبقي فالإسعاف 5200 .
- مكيناش منحة و مكيناش داخلية
- المعهد كاين ف 8 ديال المدن لي هوما : طنجة الرباط كازا فاس وجدة مراكش اكادير العيون.
- القراية كلها فرنسية مكاينش حس العربية
- البروغرام كيكون مشارجي 8 ديال الساعات فاليوم
- الغياب ممنوع
- واخا تكون عندك ليسونس دفع بالنيفو لي طالبين راه مكينش امتيازات للناس لي عندهم نيفو طالع فالقراية و ايلا دفعتي مثلا بالإجازة كن أكيد مغتقبلش